اسلام آباد: وزیراعظم شہباز شریف نے جمعرات کو قطر کے وزیراعظم اور وزیر خارجہ شیخ محمد بن عبدالرحمن بن جاسم الثانی سے ٹیلی فون پر بات کی۔
دونوں رہنماؤں کے درمیان "پرجوش اور دوستانہ” گفتگو ہوئی جس میں موجودہ علاقائی صورتحال پر مفید تبادلہ خیال کیا گیا۔
دونوں فریقوں نے خطے میں دیرپا امن کے لیے جاری کوششوں کی حمایت کا دوبارہ عزم ظاہر کیا۔
وزیراعظم نے 16 اپریل کو دوحہ کے اپنے حالیہ دورے کا حوالہ دیتے ہوئے کہا کہ شیخ تمیم بن حمد الثانی اور قطری قیادت کے ساتھ ملاقات علاقائی امن کی کوششوں میں اتفاق رائے پیدا کرنے میں بہت مددگار ثابت ہوئی۔
یہ بھی پڑھیں : اسرائیل کی توسیع پسندانہ پالیسیاں خطے کے لیے سب سے بڑا خطرہ ہیں، رجب طیب اردگان
انہوں نے کہا کہ پاکستانی عوام قطر کے امیر کے مناسب وقت پر پاکستان کے دورے کے منتظر ہیں اور یہ دورہ دونوں ممالک کے درمیان دو طرفہ تعلقات کو مزید مضبوط بنائے گا۔
دوسری جانب قطر کے وزیراعظم نے علاقے میں امن اور استحکام کے لیے پاکستان کی مسلسل کوششوں کی تعریف کی۔
قطر کے وزیراعظم نے وزیراعظم شہباز شریف کو یقین دلایا کہ دوحہ پاکستان کی قیادت میں چلنے والی سفارتی کوششوں کی حمایت جاری رکھے گا تاکہ مشرق وسطیٰ کے سیکیورٹی اور استحکام کو یقینی بنایا جا سکے۔
دونوں رہنماؤں نے باہمی دلچسپی کے تمام مسائل پر قریبی رابطہ اور ہم آہنگی برقرار رکھنے پر اتفاق کیا۔
About The Author
