امریکی کانگریس میں پاکستان کے حق میں بڑی قرارداد منظور

امریکی کانگریس میں پاکستان کے حق میں بڑی قرارداد منظور

واشنگٹن (8 مئی 2026): امریکی ایوان نمائندگان میں پاکستان کے حق میں بڑی قرارداد منظور کر لی گئی ہے۔

ایران جنگ میں پاکستان کی سفارتی کوششوں کو عالمی سطح پر بڑی پذیرائی مل گئی ہے۔ امریکی کانگریس (ایوان نمائندگان) میں پاکستان کی امن کوششوں کی حمایت میں قرارداد پیش کر دی گئی۔

غیر ملکی میڈیا کے مطابق امریکی کانگریس میں یہ قرارداد رکن ال گرین نے پیش کی، جس میں پاکستان کو ایران جنگ کے دوران ایک غیر جانبدار اور قابل اعتماد ثالث قرار دیا گیا۔

یہ بھی پڑھیں : پوپ لیو اور مارکو روبیو کے درمیان تحائف کا تبادلہ

قرارداد میں ایران تنازع میں پاکستان کے کردار کو سراہتے ہوئے کہا گیا کہ پاکستان نے ایران اور امریکا کے درمیان سفارتی رابطے قائم رکھنے میں اہم کردار ادا کرنے کے ساتھ جنگ بندی اور مذاکرات کی راہ ہموار کرنے میں بھرپور تعاون کیا اور سفارتی وفود کی میزبانی اور مذاکرات کے لیے خصوصی اور قابل ستائش اقدامات کیے۔

قرارداد میں جنگ کی ہلاکت خیزی کا ذکر کرتے ہوئے کہا گیا کہ اس جنگ کے باعث ہزاروں افراد ہلاک اور لاکھوں بے گھر ہوئے۔ اقوام متحدہ کے ادارے کے اعداد و شمار کے مطابق جاری تنازع کے نتیجے میں تقریباً 32 لاکھ افراد بے گھر ہوئے۔

امریکی ایوان میں پیش کی گئی قرارداد میں یہ بھی بتایا گیا کہ اس تنازع پر روزانہ تقریباً ایک ارب ڈالر خرچ ہو رہے ہیں جب کہ اس جنگ نے عالمی توانائی سپلائی اور فیول مارکیٹ کو بھی شدید متاثر کیا۔

قرارداد میں تنازع کے خاتمے پر زور دیتے ہوئے کہا گیا ہے کہ جنگ کا خاتمہ نہ صرف خطے بلکہ پوری دنیا کے مفاد میں ہے۔

About The Author

Mudasar Hussain

مدثر حسین ایک کانٹینٹ رائٹر، میڈیا کنٹریبیوٹر اور TheVoiceOfUmmah.com کے نیوز ریسرچر اور پبلشر ہیں۔ وہ حالاتِ حاضرہ اور مسلم دنیا سے متعلق عالمی امور پر گہری نظر رکھتے ہیں، خبروں کی تحقیق کرتے ہیں اور ویب سائٹ پر بروقت خبریں، تجزیے اور مضامین شائع کرتے ہیں۔ ان کا کام مستند، بروقت اور ذمہ دارانہ صحافت کے اصولوں کے مطابق معلومات فراہم کرنا ہے۔

See author's posts