دی وائس آف امہ: غزہ شہر کے مغربی علاقے الرمال میں اسرائیلی بمباری سے لگنے والی آگ سے زندہ بچ نکلنے والی ننھی مریم احمد غانم کی کہانی نے دنیا بھر میں لوگوں کو جھنجھوڑ دیا ہے۔ اس حملے میں مریم کی والدہ ریم عوض شہید ہو گئیں، جبکہ ان کے والد جنگ کے آغاز میں ہی شہید ہو چکے تھے۔ یوں ڈھائی سالہ مریم ماں اور باپ دونوں کے سائے سے محروم ہو گئی۔
الجزیرہ کے مطابق بدھ کی صبح اسرائیلی طیاروں نے حی الرمال میں "ابو طلال” چوراہے کے قریب ایک رہائشی اپارٹمنٹ کو نشانہ بنایا، جس سے ریم عوض شہید اور متعدد شہری زخمی ہوئے۔ اسی روز غزہ کی پٹی میں اسرائیلی حملوں میں مجموعی طور پر پانچ فلسطینی شہید ہوئے۔
غزہ کی ننھی مریم: شعلوں سے نکلی مگر یتیم ہو گئی
فلسطینی انفارمیشن سینٹر (پال انفو) کے مطابق بمباری کے بعد اپارٹمنٹ آگ کے شعلوں میں گھر گیا اور مریم ان شعلوں کے درمیان پھنس گئی۔ اسی دوران نوجوان علی الجعفراوی کی پکار گونجی: "یا اللہ، یہاں بچے زندہ ہیں اور چیخ رہے ہیں”، جس کے بعد نوجوانوں نے موت سے دوڑ لگاتے ہوئے بچی کو آگ سے نکال لیا۔ عینی شاہدین نے پال انفو کو بتایا کہ آگ انتہائی شدید تھی اور اگر نوجوان بچی کی کراہیں نہ سنتے تو اسے بچانا ممکن نہ ہوتا۔ مریم کو جلنے کے زخموں اور شدید چوٹوں کے ساتھ نکالا گیا۔
سول ڈیفنس کے ایک اہلکار نے پال انفو کو بتایا کہ امدادی ٹیمیں بار بار بچوں اور شہریوں کو کیمروں کے سامنے جلتے دیکھتی ہیں۔ رپورٹ کے مطابق ادویات اور اینٹی بائیوٹکس کی قلت، جو گزرگاہوں کی بندش سے جڑی ہے، شدید جھلسے ہوئے زخمیوں کی زندگیوں کے لیے خطرہ بڑھا رہی ہے، اور غزہ میں تقریباً 42 ہزار زخمی اعضا کٹنے اور شدید جھلسنے جیسے سنگین اور دیرپا زخموں کا شکار ہیں۔
جنگ بندی کے باوجود غزہ پر حملے جاری
انادولو کے مطابق جمعرات کو شمالی غزہ شہر کے علاقے شیخ رضوان میں ایک اسرائیلی ڈرون حملے میں چار فلسطینی زخمی ہوئے، جن میں سے ایک کی حالت نازک ہے۔ عینی شاہدین کے مطابق ڈرون نے ایک کیفے کے سامنے سے گزرنے والے شخص کو نشانہ بنایا، جس سے اس کا ایک عضو کٹ گیا۔ جنوبی غزہ میں اسرائیلی جنگی بحری جہازوں نے تقریباً دو گھنٹوں کے دوران رفح کے ساحل پر 40 سے زائد بار فائرنگ کی، جبکہ خان یونس میں قابض فوجیوں نے بے گھر فلسطینیوں کے خیموں کی جانب فائرنگ کی۔
غزہ کی وزارتِ صحت کے مطابق 10 اکتوبر 2025 سے نافذ جنگ بندی کی اسرائیلی خلاف ورزیوں میں اب تک 1,505 فلسطینی شہید اور 5,332 زخمی ہو چکے ہیں۔ اکتوبر 2023 سے امریکہ کی حمایت سے جاری اسرائیلی جارحیت میں 74 ہزار سے زائد فلسطینی شہید اور ایک لاکھ 75 ہزار سے زائد زخمی ہوئے ہیں، جبکہ غزہ کا 90 فیصد بنیادی ڈھانچہ تباہ ہو چکا ہے۔
مزید پڑھیں: آبنائے ہرمز ایرانی حقوق تسلیم ہونے تک بند رہے گی: جنرل حاتمی
About The Author
