قابض اسرائیلی فوجیں مسلسل 287 ویں دن بھی غزہ کی پٹی میں جنگ بندی کے معاہدے کی خلاف ورزی کا سلسلہ جاری رکھے ہوئے ہیں۔ فضائی حملوں، توپ خانے کی گولہ باری اور گھروں کو دھماکوں سے اڑانے کی کارروائیاں تیز کر دی گئی ہیں جبکہ نام نہاد یلو لائن کے دائرے کو پھیلانے کا عمل بھی جاری ہے۔
شمالی غزہ میں یمن السعید ہسپتال کے اطراف ڈرون حملے میں دو فلسطینی شہید ہوئے جبکہ جنوبی غزہ کے خان یونس میں اہل الخیر کیمپ 2 کے اندر ایک اور شہری شہید ہو گیا۔
یہ بھی پڑھیں : حماس: میٹرک طلبہ کی کامیابی جنگ کے باوجود فلسطینی عزم اور تعلیم کی فتح ہے
جبالیہ کیمپ کے علاقے الفالوجا میں زخمی ہونے والے نوجوان محمد ابو شکیان بھی شہید ہو گئے۔ شہداء میں عبداللہ حسان، صائب احمد ابو معلا اور مفید عبدالحمید ابو العینین شامل ہیں۔ کرم ابو سالم گزرگاہ پر متعدد ٹرک ڈرائیوروں کو حراست میں لے لیا گیا۔
فلسطینی وزارت صحت کے مطابق 10 اکتوبر کو جنگ بندی کے آغاز سے اب تک شہداء کی تعداد 1180 ہو چکی ہے جبکہ 3810 افراد زخمی ہوئے اور 802 لاشیں ملبے سے نکالی گئی ہیں۔ 7 اکتوبر 2023 سے اب تک کل شہداء کی تعداد 73 ہزار 305 اور زخمیوں کی تعداد ایک لاکھ 73 ہزار 918 تک پہنچ گئی ہے۔
About The Author
