اسرائیلی فورسز نے غزہ شہر کے مغربی اور جنوبی علاقوں میں رات کے وقت شدید بمباری کر کے کم از کم 9 فلسطینیوں کو شہید کر دیا۔ یہ حملے رہائشی عمارتوں پر کیے گئے جب لوگ سو رہے تھے۔
لباد خاندان کے 5 افراد — والد، والدہ اور ان کے تین بچوں — ایک ہی حملے میں شہید ہو گئے۔ خاندان کی صرف ایک بچی ہلا لباد بچی رہی جو معمولی زخمی ہوئی۔
یہ بھی پڑھیں : غزہ میں چھ ماہ کا سب سے بڑا جانی نقصان، اسرائیل نے بمباری تیز کر دی
فلسطینی سول ڈیفنس نے موقع پر موجود صورتحال کو انتہائی دہشت ناک قرار دیا۔ حملے کے بعد ایک اپارٹمنٹ میں آگ بھڑک اٹھی اور ریسکیو ٹیموں کو ملبے تلے سے لاشیں نکالنے میں شدید مشکلات کا سامنا کرنا پڑا۔
ان حملوں میں کم از کم 15 افراد زخمی بھی ہوئے۔ یہ واقعات اُس وقت پیش آئے جب اسرائیل نے امریکہ کی ثالثی میں طے پانے والی جنگ بندی کے باوجود غزہ پر بمباری میں تیزی لا دی ہے۔
مئی کے مہینے میں اسرائیلی حملوں میں 119 فلسطینی شہید ہوئے جو رواں سال کا سب سے زیادہ ماہانہ جانی نقصان ہے۔ اسرائیلی وزیر اعظم بنیامین نیتن یاہو کا کہنا ہے کہ ان کی فورسز غزہ کے تقریباً 60 فیصد علاقے پر قبضہ کر چکی ہیں اور اسے 70 فیصد تک بڑھانا چاہتے ہیں۔
غزہ کی وزارت صحت کے مطابق اکتوبر 2023 سے اب تک اسرائیلی فورسز نے تقریباً 73 ہزار فلسطینیوں کو شہید کر دیا ہے جبکہ 1 لاکھ 70 ہزار سے زائد زخمی ہوئے ہیں۔
About The Author
