ایرانی آئل ٹینکروں پر حملہ ہوا تو خطے میں امریکی اڈوں کو نشانہ بنائیں گے

ایران کی پاسداران انقلاب نے امریکا کو واضح خبردار کیا ہے کہ اگر ایرانی آئل ٹینکروں کو نشانہ بنایا گیا تو خطے میں موجود تمام امریکی فوجی تنصیبات کو جوابی کارروائی کا نشانہ بنایا جائے گا۔

پاسداران انقلاب کے ایرو اسپیس کمانڈر ماجد موسوی نے اپنے بیان میں کہا کہ ہمارے میزائل اور ڈرونز خطے میں امریکی اہداف اور کسی بھی جارح دشمن کے بحری جہازوں کو تباہ کرنے کے لیے مکمل طور پر تیار ہیں۔

انہوں نے مزید کہا کہ دشمن کے تمام اہم اہداف کو لاک کر دیا گیا ہے اور ہماری افواج صرف اعلیٰ قیادت کے حکم کا انتظار کر رہی ہیں۔

ایرانی حکام کا کہنا ہے کہ کسی بھی قسم کی مہم جوئی کا بھرپور جواب دیا جائے گا اور ایران اپنی معاشی اور دفاعی مفادات کے تحفظ کے لیے ہر حد تک جائے گا۔

یہ بھی پڑھیں : بحرین نے ایران کی حمایت پر 69 افراد کی شہریت ختم کر دی

دوسری جانب ایران کی فوج کے ترجمان بریگیڈیئر جنرل اکرمی نیا نے خبردار کیا ہے کہ جو بھی ممالک امریکا کی ایران پر عائد پابندیاں نافذ کریں گے انہیں آبنائے ہرمز سے گزرنے میں مشکلات کا سامنا کرنا پڑے گا۔

بریگیڈیئر جنرل اکرمی نیا نے کہا کہ جنگ میں دشمن اپنے کسی بھی مقصد میں کامیاب نہیں ہوا اور ایرانی نظام کے سیاسی توازن کو بھی نقصان نہیں پہنچا بلکہ ملک کے اندر اتحاد اور یکجہتی میں اضافہ ہوا ہے جس کا مظاہرہ عوام کی سڑکوں پر موجودگی سے دیکھا جا سکتا ہے۔

ان کا کہنا تھا کہ دشمن نے دیکھ لیا کہ وہ اس مزاحمت کو توڑنے میں ناکام رہا اور آخر کار اسے جنگ بندی قبول کرنا پڑی۔

ترجمان ایرانی فوج نے یہ بھی کہا کہ امریکا سے جاری جنگ بندی کے دوران ایران نے اپنی فوجی قوت اور صلاحیتوں کو مزید مضبوط کیا، ممکنہ اہداف کی فہرست کو اپ ڈیٹ کیا اور اپنی دفاعی و جارحانہ پوزیشنوں کو مزید بہتر بنایا

About The Author

Mudasar Hussain

مدثر حسین ایک کانٹینٹ رائٹر، میڈیا کنٹریبیوٹر اور TheVoiceOfUmmah.com کے نیوز ریسرچر اور پبلشر ہیں۔ وہ حالاتِ حاضرہ اور مسلم دنیا سے متعلق عالمی امور پر گہری نظر رکھتے ہیں، خبروں کی تحقیق کرتے ہیں اور ویب سائٹ پر بروقت خبریں، تجزیے اور مضامین شائع کرتے ہیں۔ ان کا کام مستند، بروقت اور ذمہ دارانہ صحافت کے اصولوں کے مطابق معلومات فراہم کرنا ہے۔

See author's posts