مقبوضہ بیت المقدس – اسرائیلی فوج کی شدید ناکہ بندی، رکاوٹوں اور صیہونی آباد کاروں کی غنڈہ گردی کے باوجود 75 ہزار فلسطینی نمازیوں نے مسجد اقصیٰ المبارک کے صحنوں میں جمعہ کی نماز ادا کر کے صیہونی عزائم کو خاک میں ملا دیا۔
اسلامی اوقاف کے محکمے نے تصدیق کی کہ آج دسیوں ہزار غیور فلسطینیوں نے جوش و جذبے سے نمازِ جمعہ ادا کی۔
نمازِ جمعہ سے قبل صیہونی آباد کاروں نے باب الاسباط کے مقام پر اشتعال انگیز تلمودی رسومات ادا کیں اور رقص کیا۔ انہوں نے مبارک مسجد اقصیٰ پر قبضے کی یاد میں ہیکل کی تصاویر والے جھنڈے بھی لہرائے۔
ذرائع کے مطابق آباد کاروں نے نہتے فلسطینی نمازیوں پر وحشیانہ حملے کیے، بالخصوص شارع الواد اور باب المجلس کے قریب بوڑھے نمازیوں کو لاٹھیوں اور مکوں کا نشانہ بنایا۔
یہ بھی پڑھیں : جنین کیمپ پر اسرائیلی یلغار، ایک فلسطینی نوجوان شہید
اسرائیلی فوج نے مسجد اقصیٰ کے متعدد دروازوں پر تالے لگا دیے اور پرانے شہر کو فوجی چھاؤنی میں تبدیل کر دیا۔ نماز کے بعد 9 فلسطینی نوجوانوں کو گرفتار کر لیا گیا۔
یہ واقعہ صیہونی دشمن کی مسجد اقصیٰ پر قبضے اور اس کی اسلامی شناخت تبدیل کرنے کی مسلسل سازشوں کا حصہ ہے۔
About The Author
