دی وائس آف امہ : سدے تیمان تشدد کے معاملے پر برسلز میں قائم انسانی حقوق تنظیم ہند رجب فاؤنڈیشن نے عالمی فوجداری عدالت کے پراسیکیوٹر سے اسرائیلی ڈاکٹروں، اعلیٰ طبی حکام اور اسرائیلی میڈیکل ایسوسی ایشن کے خلاف تحقیقات کی درخواست کی ہے۔ ڈیز آف پیلسٹائن کے مطابق روم اسٹیچوٹ کی شق 15 کے تحت یہ درخواست 8 اکتوبر کو دائر کی گئی، جس کی تفصیلات ہفتے کو سامنے آئیں۔
سدے تیمان تشدد: ہتھکڑیوں اور آنکھوں پر پٹی میں علاج
انادولو ایجنسی کے مطابق شکایت میں کہا گیا ہے کہ اسرائیلی وزارت صحت کی 19 دسمبر 2023 کی ہدایت کے تحت طبی عملے کو قیدیوں کا علاج اس حالت میں کرنا تھا کہ ان کے ہاتھ بندھے اور آنکھوں پر پٹی ہو۔ عملے کو اپنے نام ظاہر نہ کرنے اور ریکارڈ پر صرف عہدہ لکھنے کی ہدایت تھی، جس سے انفرادی ذمہ داری چھپائی گئی۔
فاؤنڈیشن کے مطابق اپریل 2024 میں ایک ڈاکٹر نے حکام کو لکھا کہ ہتھکڑیوں سے لگنے والے زخموں کے باعث ایک ہفتے میں دو قیدیوں کی ٹانگیں کاٹنا پڑیں۔ شکایت میں بغیر مناسب بے ہوشی کے آپریشنز کا بھی ذکر ہے، اور کہا گیا ہے کہ نومبر 2025 تک کم از کم 29 فلسطینی قیدی تشدد، طبی غفلت یا دونوں کے باعث وہاں شہید ہو چکے تھے۔
مزید پڑھیں : فلوٹیلا کارکنان پر اسرائیلی شدید تشدد اور جنسی درندگی، حماس کی شدید مذمت
سابق وزرائے صحت اور میڈیکل ایسوسی ایشن نامزد
انادولو کے مطابق شکایت میں سابق وزرائے صحت موشے اربیل اور اوریل بوسو، اسرائیلی میڈیکل ایسوسی ایشن کے سربراہ زیون حگائی اور دیگر عہدیداروں کے نام شامل ہیں۔ فاؤنڈیشن کا مؤقف ہے کہ یہ اقدامات جنگی جرائم اور انسانیت کے خلاف جرائم کے زمرے میں آتے ہیں۔ یہ درخواست ابھی فرد جرم یا عدالتی فیصلہ نہیں بلکہ تحقیقات کی اپیل ہے۔
ماخذ: انادولو ایجنسی، ڈیز آف پیلسٹائن
About The Author
