دی وائس آف امہ : پاکستانی عازمینِ حج کے لیے سود سے پاک "حج سیونگ پلان” متعارف کرانے کی راہ ہموار ہو گئی ہے۔ ریڈیو پاکستان کے مطابق وزیراعظم شہباز شریف نے وزارتِ مذہبی امور و بین المذاہب ہم آہنگی، وزارتِ خزانہ اور قومی بچت کی مشترکہ سمری کی منظوری دے دی ہے، جس کے تحت شرعی اصولوں کے مطابق ایک ڈیجیٹل مالیاتی نظام قائم کیا جائے گا۔
ماہانہ بچت اور بلا کٹوتی واپسی
روزنامہ پاکستان کے مطابق وزارتِ مذہبی امور میں وفاقی سیکرٹری ابرار احمد مرزا کی زیر صدارت اجلاس ہوا جس میں وزارتِ خزانہ، مرکزی قومی بچت اور حج ونگ کے افسران شریک ہوئے۔ اجلاس کو بتایا گیا کہ اس منصوبے کے تحت عازمین ڈیجیٹل ذرائع سے ماہانہ بنیاد پر رقم جمع کرا سکیں گے، اپنی مرضی سے بچت کی مدت منتخب کر سکیں گے، فنڈز خاندان کے کسی فرد کو منتقل کر سکیں گے اور کسی بھی وقت بلا کٹوتی رقم واپس لے سکیں گے۔
سیکرٹری مذہبی امور نے کہا کہ حج سیونگ پلان کا بنیادی مقصد عازمین کو سفرِ حج کے اخراجات کے لیے بروقت اور منظم مالی منصوبہ بندی کا موقع دینا، بڑھتی مہنگائی کا مقابلہ کرنا اور مقدس سفر کی تیاری کو آسان بنانا ہے۔
مزید پڑھیں : حج 2026: پاکستانی عازمین نے 139 ارب روپے سے زائد خرچ کیے
عمرہ اور زیارات کے لیے بھی گنجائش
سیکرٹری نے متعلقہ اداروں کو ہدایت کی کہ منظور شدہ سمری کے مطابق قواعد و ضوابط دو ماہ کے اندر تیار کیے جائیں، اور ان میں حج سیونگ فنڈ کے ساتھ عمرہ سیونگ سکیم اور مذہبی زیارات سیونگ سکیم کی گنجائش بھی رکھی جائے۔ روزنامہ پاکستان کے مطابق یہ نظام حج انتظامات کو ڈیجیٹائز کرنے کی حکومتی پالیسی کی کڑی ہے، جبکہ طریقہ کار، اہلیت اور مدت سے متعلق تفصیلات مناسب وقت پر جاری کی جائیں گی۔
ماخذ: ریڈیو پاکستان، روزنامہ پاکستان
About The Author
