دی وائس آف امہ : فرانسیسی مزدور یونینوں اور فلسطین حامی تنظیموں نے اسرائیلی اسلحہ ساز کمپنی ایلبٹ سسٹمز لینڈ کے لیے بھیجی جانے والی فوجی پرزوں کی کھیپ کو ایئر فرانس کی پرواز سے روانہ ہونے سے روک دیا ہے۔ ڈیز آف پیلسٹائن کے مطابق یہ کھیپ جمعرات 8 اکتوبر کو پیرس کے چارلس ڈیگال ایئرپورٹ سے تل ابیب جانے والی پرواز AF966 پر بھیجی جانی تھی۔
ایئرپورٹ ملازمین کی مزاحمت
رپورٹ کے مطابق اس مہم میں جنرل کنفیڈریشن آف لیبر (سی جی ٹی)، سُد ایرین اور سولیداریز کی شاخوں کے ساتھ اُرجانس پیلسٹائن اور پیلسٹینین یوتھ موومنٹ شامل تھیں۔ یونینوں کے مشترکہ بیان کے مطابق کھیپ میں "پلینیٹری گیئر ریڈیوسرز” نامی مکینیکل پرزے تھے جو مبینہ طور پر ایلبٹ کی فوجی گاڑیوں کے نظام میں استعمال ہوتے ہیں۔ یونینوں نے کارگو ہینڈلنگ اور لوڈنگ کے ملازمین کو اس کامیابی کا کریڈٹ دیا اور ایئر فرانس سے عوامی عہد کا مطالبہ کیا کہ وہ اسرائیلی فوجی استعمال کا سامان نہیں لے جائے گی۔
ایئر فرانس نے ان رپورٹس کو مسترد کرتے ہوئے کہا کہ اس کے پاس ایسی کوئی بکنگ نہیں تھی اور وہ اسرائیل کو اسلحہ یا گولہ بارود نہیں لے جاتی، تاہم یونینوں نے اپنے دعوے کے حق میں دستاویزات ہونے پر اصرار کیا۔
مزید پڑھیں : اسپین میں فلسطین کے حق میں عظیم الشان احتجاجی مظاہرہ: اسرائیل کے بائیکاٹ کا مطالبہ
فرانسیسی مزدور یونینوں کا مکمل اسلحہ پابندی کا مطالبہ
یونینوں نے خبردار کیا کہ سینٹ ایتیین کی کمپنی میژنو پریسیژن گیئرنگ اور فریٹ کمپنی ڈی ایس وی نے یہ کارگو ہفتہ 10 اکتوبر کو اسرائیلی ایئرلائن ال عال کی پرواز LY220 پر دوبارہ بک کرا دیا ہے۔ تنظیموں نے فرانسیسی کسٹم حکام، ایئرپورٹ انتظامیہ اور حکومت سے فوری مداخلت کا مطالبہ کرتے ہوئے کہا کہ فوجی برآمدات سے متعلق فرانس کی بین الاقوامی قانونی ذمہ داریاں ہر ایئرلائن پر لاگو ہوتی ہیں، اور اسرائیل پر مکمل اسلحہ پابندی عائد کی جائے۔
ماخذ: ڈیز آف پیلسٹائن
About The Author
