دی وائس آف امہ : نائیجیریا کی وسطی ریاست پلیٹو میں مسجد سے لوٹنے والے نمازیوں پر حملہ کیا گیا، جس میں ایک نوجوان جاں بحق اور دوسرا زخمی ہو گیا۔ نائیجیرین ویب سائٹ نیوز این جی کے مطابق مشتبہ بیروم ملیشیا نے نمازِ مغرب کے بعد گھر لوٹنے والے فولانی نوجوانوں کو نشانہ بنایا۔
نمازِ مغرب کے بعد فائرنگ
سیکیورٹی ذرائع کے مطابق واقعہ جمعہ 9 اکتوبر کو شام تقریباً 5 بج کر 42 منٹ پر بارکن لادی لوکل گورنمنٹ ایریا میں دوروا–رافامول روڈ پر پیش آیا۔ رافامول کمیونٹی کی ہنگامی کال پر پہنچنے والے فوجیوں نے دیکھا کہ دو افراد کو گولیاں ماری جا چکی تھیں۔
28 سالہ عبداللہ یعقوب موقع پر ہی جاں بحق ہو گئے، جبکہ عبداللہ امینو کی ٹانگ میں گولی لگی اور انہیں بارکن لادی جنرل اسپتال منتقل کیا گیا۔ ذرائع کے مطابق جائے وقوعہ سے 7.62 ملی میٹر کے تین خالی خول ملے۔ فوج نے حملہ آوروں کی تلاش اور ممکنہ جوابی کارروائیوں اور کشیدگی روکنے کے لیے دوروا بابوجے اور رافامول میں آپریشن تیز کر دیا ہے۔
مزید پڑھیں : نائجیریا کا دعویٰ: فوج نے شمال مغربی ریاست زامفارا میں 300 سے زائد ڈاکو مارے گئے
مسجد سے لوٹنے والے نمازیوں پر حملہ: پہلا واقعہ نہیں
نائیجیریا میں نمازیوں پر حملے نئے نہیں۔ سہارا رپورٹرز کے مطابق 21 اگست کو ریاست نائجر کے ضلع دیکارا میں مسلح افراد نے نمازِ جمعہ کے دوران حملہ کر کے نمازیوں کو اغوا کیا۔ ایک دستاویز کے مطابق 547 مغوی، جن میں مرد، خواتین اور بچے شامل ہیں، کینجی لیک نیشنل پارک کے جنگل میں لے جائے گئے، اور 24 ستمبر تک ان کا کچھ پتا نہیں چل سکا تھا۔
ماخذ: نیوز این جی، سہارا رپورٹرز
About The Author
