غاصب یہودی آباد کاروں کی مسلح ملیشیاؤں نے آج پیر کے روز الخلیل کے جنوبی علاقے مسافر یطا میں فلسطینی شہریوں اور ان کی املاک پر وحشیانہ حملے کیے۔
مقامی ذرائع کے مطابق آباد کاروں نے مسافر یطا کے علاقے حوارہ میں فلسطینی شہری ہشام الصریع کے گھر پر دھاوا بولا، گھر کی تلاشی لی اور اہل خانہ کو سنگین نتائج کی دھمکیاں دیں۔
اسی علاقے کے گاؤں التوانہ میں آباد کاروں نے ایک شہری مجد ربعی کی گاڑی کے ٹائر پنکچر کر دیے اور غیر ملکی رضاکاروں کی گاڑی پر بھی حملہ کیا۔
گذشتہ روز بھی آباد کاروں نے مسافر یطا کے علاقے رجوم اعلیٰ میں فلسطینی شہری اسماعیل العدرہ کے 20 سے زائد زیتون کے پودے اکھاڑ کر توڑ ڈالے اور مویشی فصلوں کو شدید نقصان پہنچایا۔
قابض اسرائیلی فوج نے یطا کے صحرائی علاقے خشم الدرج کے قریب وادی القراشیہ میں فلسطینی شہری خالد سلیمان البدور کے ڈیرے، غار، رہائشی مکان اور بھیڑوں کے باڑے مسمار کر دیے اور ایک خیمہ ضبط کر لیا۔
یہ بھی پڑھیں : غزہ ساحل پر اسرائیلی چھاپہ، مچھلی پکڑنے والے تین سگے بھائی اغوا
فوجی وردی میں ملبوس آباد کاروں نے یطا کے مشرقی علاقے ماعین الخالدیہ روڈ پر نوجوان محمد توفیق الحمامدہ کو یرغمال بنا کر شدید تشدد کا نشانہ بنایا اور اسے جان سے مارنے کی دھمکیاں دیں۔
اقوام متحدہ کے مطابق قابض اسرائیل نے 2025 کے آغاز سے اب تک مغربی کنارے میں تقریباً 40 ہزار فلسطینیوں کو ان کے گھروں سے بے دخل کیا ہے۔
About The Author
